هرتلة مسائية

عارفة عارفة متأخر فشخ على الهري ده وبعد الهناء بسنة على رأي المثل بس نعمل إيه بقى الكلمتين واقفين في زوري ولازم يطلعوا مش ذنبي والنعمة وطبعاً زي ما انتوا أكيد خمنتوا ده أكيد تعليقي (الثمين والعميق فشخ) عن الأحداث السياسية في مصر بقالي شهر بنبهر بإستمرار فقولت أبهركم معي. 

ثورة ولا إنقلاب:

ده جدل مستمر من ساعة ما السيسي خلع مرسي. وفي حقيقة الأمر هي خليط ما بين الإثنين. أولاً إيه هو الإنقلاب؟ الإنقلاب هو عمل منظم من القوات المسلحه الخاصة بالبلد الهدف منوا هو إسقاط وإستبدال الحكومة بحكومة أخرى. ممكن الإنقلاب يبقى دموي أو لأ ممكن تكون نتيجة الإنقلاب ده هي إن الجيش يحكم البلد أو لأ ممكن تيجي حكومة تابعة للجيش أو لأ. ونسبةً إن الجيش تدخل عشان يطيح بالحكومة فالحصل يصنف على إنه إنقلاب. بس في نفس الوقت الناس أصلاً عملوا مظاهرات من أجل خلع النظام فبمعنى أصح الحصل في مصر شيء ملوش تصنيف مترتب ولي معنى. لأن مفيش حاجة اسمها ثورة مدعومة من كل أجهزة الدولة سواء داخليه أو جيش أو حتى إعلام. وماينفعش نتجاهل تماماً إن الشعب كان كارهه الحكومة تماماً وعايز يخلعها ونزل من أجل تحقيق الهدف ده يوم 30.

اه وتشبيه 30 يونيو ب-25 يناير استهبال عشان وقت مبارك الداخليه نزلت تقتل في الناس مش زي ماحصل في 30 الظباط نزلوا يتظاهروا. الجيش لم يتدخل وقت مبارك غير في الأخر ووقف يتفرج على الناس وهي بتتقتل فبلاش هري فارغ. 

الاخوان مسؤلين عن كل حاجة:

أنا متفقة تماماً إن الاخوان مجرمين وكل همهم تقسيم التورتاية بس في نفس الوقت تلبسهم كل حاجة بما فيها الإعتداء وقتل المتظاهرين في ثورة 25 يناير وكل حاجة بعد كدة هو استهبال وتصديق الكلام الأهبل ده استهبال. الداخليه والجيش هما المسؤلين عن المجازر الحصلت في الفترة الانتقاليه وتدخلهم في خلع مرسي ده لن يشفعلهم تماماً. 

الإعلام المصري:

ارحموا من في الأرض ليرحمكم من في السماء الكلام ده موجهه للكل سواء المشاهدين أو الاعلاميين ذات نفسهم. الاعلاميين معدومين المهنيه والمصداقيه وكلنا عارفين كدة ده مش خبر جديد خالص. لكن إن احنا فجأه كدة نصدق هرتلة إعلاميين زي خيري رمضان ولميس الحديدي ويبقى ده مصدر معلوماتنا الرئيسيونردد كلامهم بكل ثقة تبقى كارثة ونبقى بنستهبل. ده إعلام موجه مش إعلام ثوري ولا نيلة.

النظام:

مش معقول بعد كل نبتدي نصدق كل حاجة بتقولها الداخليه والجيش، الداخليه والجيش زيهم زي الاخوان كدابين وبيقولوا أي حاجة وكل حاجة من أجل اغراضهم واحنا عارفين كدة كويس فالثقة العمياء دي ملهاش معنى. الفاسد منظومة كامله مش شخص أو اتنين بعد أكتر من 30 سنة ماحدش يحاول يقنعني ان المشكلة في القيادة فقط لا غير سواء بنتكلم على داخليه أو جيش أو أي عفريت أزرق، لو المشكلة كانت في القيادة فقط لا غير ماكنتش الحاله هتبقى كدة لكن المشكلة في مؤسسات الدولة بأكملها الداخليه والجيش وكل حاجة فاسدة من أكبر كبير لأصغر صغير.

لو حنتبع المنطق أنا فاهمة كويس أوي إن من غير تدخل الجيش احنا كلنا كنا حنلبس في الحيط ومجمعة إن ده سبب تهليل للجيش وإن الناس حتفضل مبسوطة بالجيش لإن في نظرهم هو انقذنا. بس في الحقيقة الجيش هو اللبسنا اللبسة السودة دي من الأول لإنهم الجابوا الاخوان، وفي نفس الوقت الجيش مش بيعمل حاجة الله والوطن أكيد ليهم مصلحه في الليلة غير كدة ماكانوش حيتدخلوا. بس تدخل الجيش ده لا يغفر جرائمهم هما قتلة زيهم دي الداخليه زي الاخوان. 

التفويض:

مش حهري كتير في الموضوع ده بس أولاً يع ثانياً مبادئي تديني بالجزمة لو كنت فكرت أعمل كدة ثالثاً أنزل أفوض واحد عشان يعمل شغلوا ونزل في مظاهرة تأييد زي بتوع مرسي. 

لو أنا خاينة عشان مش بطبل للجيش ولو أنا خاينة عشان مش بقول السيسي رئيسي ولو أنا خاينة عشان ضد الجيش والداخليه يبقى لا مؤاخذة وصف الخيانه شرف ليه أنا لا اتمتع بذاكرة سمكيه ومش ناوية أبيع مبادئي أنا مش ناسية ومش حنسى جرائم الداخليه والجيش. أنا مش تبع مكان العيسوي بيروحوا عشان يدعي الثورية أو الظباط بيقودوا في الهتاف من أجل إسقاط الاخوان أو تبع رابعة مع أول ناس عملوا صفقة مع العسكر عشان أنادي بإسقاط حكم العسكر أنا مليش مكان مع الناحيتين والإدعاء عكس كدة عبث أنا ضد الكل عسكر فلول اخوان داخليه. مؤسسات الدولة كلها فاسدة وأنا مش ناوية انحاز لطرف فاسد من أجل إسقاط طرف تاني فاسد يسقط الكل أنا مش ناوية اشارك في حملة تلميع العسكر والداخليه وتبرئتهم من أي حاجة وكل حاجة. أنا ضد السيسي على فكرة لو ماحدش إستنتج الموضوع ده, السيسي هو الأشرف على كشوف العذريه فالأخ ده لازم يتحاكم أصلاً مش يبقى بطل قومي.

في نهاية الأمر وقبل ما واحد إخونجي يطلعلي زي الخازوق يقولي شطرة أو أي هرتلة أخرى أحب أقول أنا ضد الكل أنا ضد العسكر وضد الداخليه وضد الاخوان لإن بالنسبه ليه هما كلهم نفس الحاجه بالنسبالي كلهم مجرمين فاسدين.  وكل الأطراف بتكدب سواء الاخوان ولا الجيش والداخليه وكل طرف عايز يظهر في دور خضرة الشريفة والإعلام ماشي مع النظام. 

وعلى فكرة لو إنت من الأشخاص الفاكرين نفسهم فهمين إيه البيحصل في الساحة السياسية في مصر يبقى إنت أهبل ماحدش فاهم حاجة ولا حيفهم في لعب كتير أوي بيحصل والنظام بيستعملنا من أجل اغراض معينة احنا مش حنفهمها دلوقتي ده إذا فهمناها أصلاً.   

المماطلة الأبديه

مدينة زويل اصدرت بيان بتاريخ 29/4/2013 و كالعادة  البيان مليان معلومات غريبة مش عارفة بيجبوها منين و تفسيرات قانونية على مزاجهم فقررت أرد على الكلام ده عشان أوضح الحقائق و نخلص من المهاترات الملهاش أي 3 لازمة. 

أول حاجة البيان بيتكلم فيها شق موضوعي و شق مستعجل ده الكلام الفي بيان المدينة: 

أولا: هذا الحكم خاص بالشق المستعجل في القضية ويتعلق بوقف قرارات إدارية بشكل مؤقت وحتى نظر الدائرة الثانية بالقضاء الإداري في الشق الموضوعي خلال أسابيع.

مبدئياً الحكم الصادر من مجلس الدولة ده للمرة ال-5000 حكم نهائي غير قابل للطعن و واجب النفاذ و سواء شق مستعجل أو موضوعي هو واجب النفاذ. ثانياً الحكم في الشق الموضوعي ده ممكن ياخد سنين. ثالث حاجة ورق الجامعة القانوني السليم 100% الاجبر المحكمة انها تصدر الحكم ده مش حيتغير بقدرة قادر يعني احنا متأكدين بنسبة 99% إن الحكم الصدر في الشق المستعجل حيبقى نفس الحكم الحيصدر في الشق الموضوعي.

الحجة دي فارغة شفلكوا حجة تانية. لأ ثانية واحدة هما فعلاً شافوا ننتقل لتاني نقطة في البيان و هي: 

ثانيا: الحكم في حيثياته وتحديدا في الصفحة 82 ألزم الحكومة بضرورة توفير بديل لمشروع مدينة زويل و هي بصدد تنفيذ ( أي قبل الشروع في التنفيذ ) هذا الشق بإعتباره المشروع الذي تهفوا إليه نفوس المصريين ويسهم في نقلة علمية كبيرة تعود بالخير على المصريين.

أحب أوضح بس إن المحكمة فقط تهيب بالحكومة توفير بديل لمدينة زويل و هي بترميه خارج أسوار مدينة زويل و ده مش شرط لتنفيذ الحكم زي ما المتحدث الإعلامي لمدينة زويل بيحاول يوهم الناس. تنفيذ الحكم إلزامي وغير مرهون بأي نوع من أنواع شروط. هارد لك مدينة زويل تنفيذ الحكم غير مرهون بإيجاد بديل لكم فارحمونا و اخلوا المباني دلوقتي حالاً. 

ننتقل بقى إلى الحجة الفارغة رقم 3:

ثالثا: عملية إخلاء المدينة والمباني هي عملية صعبة ومعقدة ويستحيل تنفيذها نظرا لأن الأجهزة الأحدث في العالم والتي تم إستيرادها لخدمة البحث العلمي لها حسابات فنية وأماكن خاصة بأبعاد ومواصفات هندسية معقدة وإستغرقت شهور طويله في تجميعها.

أولاً مين قالكم تجيبوا معدات و تحطوها  في مبنى عليه نزاع قانوني دي مشكلتكم مش مشكلتنا و خلونا نرجع بالذاكرة 5 دقائق لما كنا بنتحايل عليكم عشان تمكنونا من معدتنا و معملنا و انتم ودن من طين و ودن من عجين و ولا سائلين فينا و مارعتوش إن في طلبة و باحثين ابحاثهم و دراستهم متعطلة احنا إتعلمنا منكم عدم الاكتراث بالغير و من هنا أحب أقول لكم مش مشكلتنا و ميخصناش مشكلتكوا مع الحكومة خليها تحلهلكوا و اطلعوا برا المباني دلوقتي حالاً. 

دلوقتي معاد الحجة الفارغة رقم 4:

رابعا: هناك أكثر من 200 باحث وأستاذ وموظف يمثلون كيان المدينة حاليا ومن دون مكان جاهز وملائم لعملية البحث العلمي ومؤهل لإنطلاق الدراسة بالجامعة التي إستكملت جميع مقوماتها وتسابق الشباب المصري للإلتحاق بها ستكون هناك إنتكاسة لهذا المشروع. 

تاني اكرر مين قالكم تقبلوا باحثين في مباني عليها نزاع قانوني و أصلاً قانون المدينة لم يكتمل. و أحب اكرر كلام المدينة لينا شوفوا جامعة تانية تروحوها أو مشكلتكوا مع الحكومة هي تحلها أو المقولة المفضله عندي حناخد الشطار منكوا العندنا التخصص بتاعهم و الباقي يتصرف. احنا كنا في نفس الوضع ده بس كان في طلبة و باحثين مستقبلهم حيضيع و انتوا مافرقش معكم. دلوقتي انتوا مشكلتكوا مع الحكومة هي تحلها و جامعة النيل ملهاش دخل و الحكم واجب النفاذ سيبوا المباني فوراً. 

يلى بينا ننتقل على الحجة الفارغة رقم 5 (و يستمر و يتوغل و ينتشر):

خامسا: إن الصورة المغلوطة التي يحاول البعض ترويجها من إستيلاء مدينة زويل على الأراضي هو أمر محض إفتراء وعار تماما عن الصحة حيث تسلمت المدينة الأرض والمباني المملوكة للدولة قبل 18 شهرا خالية و بموجب قرار تخصيص من رئيس الوزراء وأعادت تأهيلها بعد تأكيد الحكومة على أنه لا يمكن تنفيذ قرار حق الإنتفاع السابق في عهد أحمد نظيف بالأرض والمباني لجامعة خاصة وكان القرار للمؤسسة المصرية لتطوير التعليم وتنازلت عنها ووقف تنفيذ القرار يعطي الحق الآن للمؤسسة وليس لجامعة النيل ( ونحن نتساءل أين هذه المؤسسة التي خصصت لها الأرض وتنازلت عنها ).

أولاً انتوا فعلاً إستولتوا على مباني جامعة النيل و حكم المحكمة رجع الأرض والمباني كلها. ثانياً خالية؟ تاني المباني خالية مفيش فايدة؟ المباني كانت مجهزة بالكامل فيها معملها و ورشها و اللجنة الوزارية العاينة المباني قالت نفس الكلام. جامعة النيل مش خاصة بدليل إن القضاء أمر بإلزام مرسي تحولها جامعة أهليه لاستيفائها كل الشروط. بردو نظيف؟ نظيف ملوش علاقة بجامعة النيل أساساً وبعدين لو حنتكلم فلول مدينة زويل تبع مين فايزة أبو النجا، أحمد شفيق، المجلس العسكري و مرسي فلول دول ولا مش فلول يا متعلمين يا بتوع المدارس. 

المؤسسة أولاً لا تملك الحق انها تتنازل عن أي حاجة أولاً لأنها تنازلت للجامعة قبل ما تتنازل للحكومة ثانياً ال-تنازل تم بالتليفون و ده مش قانوني،بقية المعلومات حتلقوها في أخر المدونة. 

يلى نضيع شوية وقت كمان وننتقل إلى نقطة رقم 6 في البيان:

سادسا: تدرك مدينة زويل أن الحملة التي تمارس ضد المدينة وعلمائها تستهدف بالأساس تقويض المشروع والقضاء على أي أمل لإحداث نهضة علمية ومعرفية في هذا الوطن خاصة أن كثيرا من الحلول كانت طرحت على جامعة النيل الموجودة في مكانها بالقرية الذكية منذ 2006 ورفضتها جميعها وكان أخصها الإندماج الكامل أو رعاية مدينة زويل لجامعة النيل حتى تقنين أوضاعها ووفرت الحكومة بديل ورفضت جامعة النيل الإنتقال.

أولاً محدش بيمارس حملة ضد المدينة و لا حاجة و لا المطالبة بتنفيذ حكم القضاء اليومين دول يعتبر حملة تشويه للمدينة؟!  تاني القرية الذكية ماشي نرجع و نقول ده مقر مؤقت مش أكتر و احنا استعملنا و انتقلنا لمباني زايد فعلياً.  

بالنسبة للإندماج أولاً لما تم طرح الفكرة دي مدينة زويل كانت لسة مجرد فكرة مكنش ليها أي وجود قانوني، ثانياً التوجه العلمي و البحثي لجامعة النيل و ما يسمى بمدينة زويل مختلف تماماً مدينة زويل تخصصها العلوم التطبيقية و مدينة زويل العلوم الأساسية يعني تخصصات مختلفة تماماً. بالنسبة للبديل الحكومة وفرتوا لجامعة النيل هو كان مدينة مبارك المدينة دي معدة لطلاب ثانوي و غير مناسبة لجامعة بحثيه دي أول حاجة، ثانياً المدينة دي أصلاً شغالة يعني احنا كان مطلوب مننا نروح مدينة فيها ناس شغالة ونرمي الناس دول في الشارع زي ما اتعامل فينا.  وبعدين خلاص ما احنا فيها طالما مدينة زويل شايفة إن مدينة مبارك مناسبة هما ينتقلوا ليها ده حتى فيها جنينة حتى حل مناسب لكل الأطراف. 

النقطه رقم 7 (كفاية أنا زهقت و المصحف):

سابعا: إن إستمرار هذه الهجمة الشرسة من شأنها تعطيل هذا المشروع خاصة أن كثيرا من الجامعات العالمية فتحت قنوات إتصال مع باحثي وعلماء المدينة لإستقطابهم.

قول و المصحف جبت التايهة يا حصبلة....جامعة النيل عندها نفس ذات الشراكات مع جامعات عالمية بس انتوا مكنش عندكوا أي مشكلة انكم تعطلوا أبحاث الجامعة عادي نو بروبلم. 

هجمة شرسة إيه يا برنس احنا بنطالب بتنفيذ الحكم لا أكثر ولا أقل.

اه و بيقولوا في أخر البيان إن في اجراءت قانونية تمنع التنفيذ، اجراءت إيه حضرتك إذا كان الحكم نهائي غير قابل للطعن و واجب النفاذ. وفي شوية كلام فارغ كمان بس مرارتي مش حتستحمل أكتر من كدة وأنا رديت عليه كلوا فوق.

في نهاية الأمر أحب أوضح إن مفيش حد فينا بيحارب مشروع زويل و لا حاجة، احنا بنطالب بتنفيذ الحكم الطلع لصالح جامعة النيل و أظن ده حقنا. مدينة زويل محتاجة تبطل هرتلة قانونية و مماطلة و تضييع وقت الحكم واضح و صريح. نص الحكم بيقول تمكين جامعة النيل من كافة مبانيها و ارضها و لم يضع أي قيود و شروط لتنفيذ الحكم. أنا بطالب مدينة زويل بتنفيذ الحكم و لو عايزين بديل يتفضلوا يروحوا مدينة مبارك الكانوا شايفينها مناسبة جداً لجامعة النيل. و بكرر جامعة النيل ملهاش أي علاقة من قريب أو بعيد بمشكلة مدينة زويل المدينة هي الخلقت هذه المشكلة و مشكلتها مع الحكومة تحلها مش معنا. 

دي شوية روابط للتوضيح:

1- ده البيان للعايز يفقع مررتوا و يقرأه

2- دي اتفاقيات التعاون مع الشركات والجامعات العالمية

3- جامعة النيل أهليه و المصحف

4- رئيس مدينة زويل شريف صدقي و هو بيزور جامعة النيل في الشيخ زايد

5- إثبات إن احنا استخدمنا مقرنا في زايد

6- تلخيص لمشكلة جامعة النيل من الأول للأخر

بلطجة علميه

أي حد ممكن يبقى بلطجي عادي الهو بيسرق وبيروع المواطنين، وطبعاً النوع ده من البلطجيه عادةً بيبقى مطلوب القبض عليه أو الداخليه ممكن تأجره بالساعة عشان ينزل يعتدي على متظاهرين أو لأي غرض تاني. النوع ده من البلطجيه منتشر جداً وأي حد ممكن يعمل كدة أصل المسألة مش محتاجة فن تماماً. بس مؤخراً ظهر نوع جديد من البلطجيه النوع ده بقى الناس بتموت في بدل ما بتخاف منه، بيأجر الداخليه بدل ما الداخليه هي البتأجره والقانون بيلتوي عشانه ومش بيسرق محفظة أو فلوس ده بقى بيسرق مباني وأرض. 

للأسف الشديد المهنة لمت بس نعمل إيه بقى نصيب، ما علينا تعالو نعدي على أهم خصائص هذا البلطجي.

أولاً: أعمل إنجاز مهم 

البلطجي ده لازم يكون عامل إنجاز مهم وفريد من نوعه عشان يخلي شعبيته واسعة والناس تموت فيه، ويبقى محل ثقة وشخصيه معروفة بدل ما كان نكرة. ممكن مثلاً يكون خد جايزة نوبل في العلوم بسبب إكتشافه الفيمتو ثانيه. ده مش تلقيح كلام خالص خالص خالص ده مجرد مثال بريء.

ثانياً: الطموح 

لازم يكون عندك طموح بمعنى ليه تسرق حاجة صغيرة ما إنت ممكن تسرق حاجة كبيرة يعني ليه تسرق عجلة أو حتى شقة ما إنت ممكن تسرق 2 مباني مجهزين وأرض مساحتها 127 فدان و ممكن نقول على الإنت سرقه مباني جامعة...... على سبيل المثال طبعاً. 

ثالثاً: الخيال الواسع

لازم يكون خيالك واسع عشان تقدر تخترع قصص تكدب بيها الناس الوحشة الحتقول انك استوليت على الجامعة بتاعتهم و تحاول تفقدهم مصداقيتهم، مثلاً:

النظام القديم كان بيحاربني.....(نعمل إيه بقى مبارك كان منفسن)

الأرض دي بتاعتي أنا حطيط حجر أساس وكانت مخصصه ليه.......(الدليل، هات صورة ليك وانت واقف في الصحراء جانب كومة طوب وقول عليهم حجر أساس. بالنسبة للتخصيص فاتتك دي يا معلم كنت المفروض تضرب ورقة)

قول على العيال البتقول عليك انك سرقت الجامعة بتاعتهم انهم منقادين ومضحوك عليهم.......(بريالة احنا معلش)

قول على أهالي العيال انهم مش فهمين حاجة ومضحوك عليهم.....(طبيعي ماهو لو العيال بريالة أهاليهم حيبقو إيه)

قول مليش دعوة بالمشكلة دي مشكلة الجامعة ما الحكومة......(قول والمصحف)

قول إدارة الجامعة وحشة ومتحلفين مع إبليس.......(شوف ازاي) 

فايزة أبو النجا أحد الرموز الوطنيه.........(أومال مين الفلول مش وخده بالي دي مدوباهم 100 حكومة)

رابعاً: الكذب

أكذب وأكذب كمان ولما تخلص كذب أكذب كمان، ما ينفعش ولا كلمة تطلع من بقك تبقى الحقيقة عشان ده تقريباً عيب. مثلاً قول إن الأرض دي بتاعتي قول إن طلاب الجامعة بيحبوني وعايزين ييجو معاية.

إسرق ماكيت الجامعة الإنت سرقت مبانيها واطلع قول الماكيت ده بتاع المشروع بتاعي وتعبت فيه بغض النظر عن إن الماكيت ده معمول لأرض مساحتها 127 فدان مش 300 بس ما علينا 
فايزة أبو النجا أحد الرموز الوطنيه........(تكرار عارفة بس مش بأيدي)

http://nancymustafa.blogspot.com/2012/04/nile-university.html

خامساً: التطبيل

لازم تبقى طبال محترف، يعني تكرس حياتك للتطبيل للنظام سواء شفيق، شرف، جنزوري، مجلس عسكري، مرسي، جماعة. قضي حياتك بطبل للسلطة.

سادساً: مصلحجي 

شوف مصلحتك فين واجري وراها حتى لو ده تطلب الوقوف مع الباطل ودعم نظام فاسد إيه يعني مش مشكلة المهم مصلحتك وطز في أي حاجة تانية. طبعاً النقطة دي حتساعد في النقطة رقم خمسة الهي التطبيل كل ما تبقى مصلحجي أكتر كل ما مبادئك حتنكمش كل ما قدرتك على التطبيل حتكبر.

سابعاً: أعمل نفسك ميت

أي حد يقولك حقي أو مش حقي، ولا كأنك سامعه. ولو طلع ليه حكم قضاء نفض للحكم وقول مليش دعوة.

ثامناً: خليك بتاع صفقات

اعمل صفقة مع النظام عشان يطعن في الحكم الطلع للخصم وإطعن إنت كمان. اعمل صفقة مع الرئيس إنه إذا خلصلك الليلة إنت حتعمل معه أحلى واجب في الإعلام، أعمل صفقة مع الرئيس خليه يطلعلك قانون قبل جلسة الطعن بكام يوم. 

تاسعاً: خليك ناصح أجر الداخليه بدل ما هي تأجرك  

كل ما العيال بتوع الجامعة الإنت سرقها يضيقوك جبلهم الداخليه تضربهم وبلاش وجع دماغ 

عاشراً: البجاحة ثم البجاحة 

اخبط واحد من الطلاب بالعربيه وبعدين اطلع قول أنا سحبت المحضر العملته ليكم عشان مستقبلكم مهم عندي ولقيتكم حتتحبسوا......(قلب أمك)

روح حط حجر أساس معهد جديد في الأرض الإنت ملكش حق قانوني عليها وحكم المحكمة ادها للعيال المزهقينك

قول أنا مليش دعوة مشكلة الجامعة مع الحكومة واحنا مستمرين في العمل، الكلام ده حتى بعد حكم المحكمة

قول للعيال أنا ممكن أخدكم عندي في المدينة بتاعتي حتى بعد قلة أدبكوا

قول على الإعلام البينتقدك لسرقتك وبلطجتك مأجور وعميل 

قول للعيال بلاش شغل الإعلام ده عشان مش حينفعكوا
فايزة أبو النجا أحد الرموز الوطنيه........(تكرار تاني عارفة بس مش بأيدي)

  

طبعاً أكيد كلنا عرفنا مين البلطجي ده القانون بيتم تشكيلة لمناسبة اغراضه وكلنا عرفنا مين الضحيه، بس أنا حخليني واضحة عشان اللسه معرفش البلطجي هو زويل البيحاول يعمل مشروع مصر للبلطجة العلميه على أرض جامعة النيل المغتصبة، جامعة النيل الطلع ليها حكم محكمة يوم 18/11/2012 ولحد دلوقتي مش عارفة تخش مبانيها، الجامعة الطلابها يتم الإعتداء عليهم من قبل جحافل الأمن الزويل بيستأجرها. جامعة النيل الحكومة مصر كلها وقفه ضدها بداءً من مرسي وقنديل لحد مصطفى مسعد، الجامعة الحقها مهدور بس طلابها لا يزالوا صامدين بعد ما إعتدى عليهم الأمن المركزي مرتين بعد ما تم تلفيق محاضر لهم وبعد ما تم احتجزهم في القسم الطلاب البقالهم أكثر من 130 يوم معتصمين. الطلاب دول وأنا ليه الفخر اني أكون منهم واقفين بثبات وعزة وكرامة ضد الحكومة وزويل رافضين الإستسلام ورافضين الإنحناء والرضوخ.

احنا مش حنستسلم وحنحارب فساد الحكومة وبلطجة زويل.    

المجد للحركات الطلابيه والمجد للأحرار.

جامعة النيل ضد الحكومة

ومازلت مشكلة جامعة النيل مستمرة ولا تنتهي ولا يحاول المسؤلين إيجاد حل لها. إعتصام واعتصمنا لف على المسؤلين ولفينا مظاهرات وإتظهرنا رد المسؤلين علينا كان دائماً هو هو لا يختلف وممكن يتلخص في الأتي:

جامعة النيل وجدت لتبقى........ (مع إنه مش باين خالص من تصرفات الحكومة معنا)

جامعة النيل ليها اهميه علميه كبيرة جداً....... (قول والمصحف )

احنا حنستنا حكم القضاء وحنحترمه وننفذه فوراً....... (يا راجل)

طبعاً الكلام ده يحسس البني أدم إن خلاص الحكومة وقفة معنا والمشكلة فضلها 5 دقائق وتتحل، عشان كدة الداخليه بعتة مرتين جيوش الأمن المركزي لضربنا وساحلنا تحقيقاً لأماني زويل. أول مرة الأمن المركزي جيه كان اليوم 21 في الإعتصام الأمن المركزي دخل حرم الجامعة ودي حاجة غير قانونيه أصلاً وطبعاً تم الإعتداء علينا بالضرب والسحل. أول مرة دي كنت قبل حجتين حكم المحكمة والقانون الطلع لزويل يعني زويل مكنش عنده أي صفة عشان يطلب تدخل الداخليه والداخليه مكنش المفروض تستجيب للطلب، بس ما علينا مش مشكلة ماهي ماشية بالكوسة. تاني مرة دي بقى هي الفعلاً جريمة بمعنى الكلمة لأن دي كانت بعد حكم المحكمة، والحكم كان باحقيه جامعة النيل بالمباني والأرض بس الحكومة تجاهلت حكم المحكمة وبردو ضربونا. 

زويل كان كل ما يتسأل عن جامعة النيل يقول أنا مليش دعوة بالمشكلة والمشكلة بتاعتهم مع الحكومة يا سبحان الله عشان كدة طلب إنه يدخل خصم في قضية الجامعة أصلاً رفعها على الحكومة، كان دائماً بيقول أنا ححترم حكم القضاء وبردو يا سبحان الله عشان كدة طعن في الحكم، فعلاً مفيش تناقض خالص والراجل واضح وصريح. 

أنا عايزة أوضح بس الأحداث المؤديه لتاني مرة اشتباكات مع الأمن.

أولاً احنا طلع لينا حكم محكمة يوم 18/11/2011 الحكم كان بيقول إن التخصيص لزويل يتوقف وإن كل حاجة ترجع لينا أرض ومباني، الحكم ده المفروض يتنفذ فوراً والطعن في الحكم ده لا يوقف التنفيذ. طبعاً ده محصلش الحكومة فضلت تعطل في التنفيذ وتتجاهله مع إن ده غير قانوني أصلاً. وطبعاً عشان زويل بيحترم أحكام القضاء وعلى رأسه من فوق طعن في الحكم وبيطالب إن احنا مناخدش أي حاجة خالص ولا حتى كشك الأمن. بس احنا قلنا خلاص مش مشكلة يطعن براحته كدة كدة هو مالوش حقوق ومفيش ورقة واحدة بتقول إن في حاجة اسمها مدينة زويل و الطعن أكيد حيترفض خصوصاً كمان إن تقرير هيئة المفوضين أوصى برفض الطعن. بعدين يا سبحان الله مرسي طلع قانون بإنشاء مدينة زويل معلش قصدي "مشروع مصر للسرقة العلميه"  لأ لأ قصدي "مشروع مصر للنهضة العلميه" يوم 20/12/2012 والمدينة تنشأ في مقر مدينة الشيخ زايد القانون ده مالوش غير معنى واحد إن مرسي خد حكم المحكمة الطلع لصالح جامعة النيل وكعورة و وقام رميه في الزبالة قضاء إيه وقانون إيه النحترمة مرسي يصنع قوانينه واحكامه الخاصة بيه. بس قلنا مش مشكلة هو مرسي كدة أعطى زويل كيان قانوني بس بردو احنا معنا الحق والوضع لم يتغير. يوم 1/1/2013 كان معاد الجلسة بتاعت الطعن ويا سبحان الله لقينا مرسي وقنديل مصطفى مسعد هما كمان طعنين في الحكم. 

ده وضح حاجات كتير بالنسبة لينا، الحكومة طول الوقت كانت بتقول احنا بنحبكوا أوي بس مش بتعمل أي حاجة طلعت منحازة من أول لحظة لزويل، الحكومة كان في اديها حاجات كتير تعملها الحكومة الطلعت قانون لزويل كان ممكن تطلع لينا احنا كمان قانون، كانت ممكن تنفذ الحكم لكن الحكومة قررت تتجاهل حكم المحكمة وتختصمنا على الأقل الحكومة كان ممكن ما تطعنش!!!! 

يوم 3/1/2013 جلنا خبر إن زويل رايح المباني بتاعتنا والأرض بتاعتنا عشان يحط حجر أساس معهد حلمي للعلوم، فكان رد الفعل الطبيعي إن احنا نروح هناك إحتجاجاً على البيحصل. احنا رافضين تماماً إن زويل يستغل المباني بتاعتنا رافضين تأمين الداخليه للمكان الداخليه راحت بناءً على إيه زويل مالوش صفة إنه يطلب التأمين ولا يمتلك المكان أصلاً عشان يطلب تأمين والداخليه تستجيب. احنا رحنا هناك وبعد إنتهاء الحفل حولنا إن احنا نكلم الناس الحضرت الحفلة عشان البيحصل ده جريمة وطبعاً كان رد الداخليه انها تعتدي علينا عشان تأمن زويل وهو خارج الداخليه اعتدت على أصحاب الحقوق لحماية اللص. 

احنا دلوقتي زويل ضدنا مرسي ضدنا قنديل ضدنا ومسعد ضدنا، الحكومة كلها بتحاربنا، ليه؟ عشان زويل بيستعمل نفوذه وشعبيته لمساعدة حكومة لا تعرف معنى الحقوق والقانون وفي المقابل هما بيحربونا. مشكلة الجامعة مش مشكلتنا احنا بس دي تمثل مشكلة البلد باكملها، الحكومة بتدور على المصالح الشخصيه وبترمي القانون في الزبالة وبتهمش القضاء. الحكومة دي لا تنحاز للقانون الحكومة دي لا تنحاز للحق الحكومة دي لا تنحاز للعدل، الحكومة منحازة للباطل والظلم والفساد الحكومة دي لا تقف في صف الشعب والمستضعفين، الحكومة في الأول والأخر تبحث عن المصالح الشخصيه. اليقف في صف الحرامي يبقى حرامي زيه واليقف في صف الفاسد يبقى فاسد زيه.

الحكومة تعتقد إن الطلبه شوية عيال مش فهمين هما بيعملو إيه وده أبعد ما يكون عن الحقيقة طلاب مصر هم المستقبل واحنا الحنعمل حملة نضافة للبلد دي. احنا حنحارب مرسي وقنديل والحكومة كلها وحناخد حقوقنا بالذوق بالعافية حنخدها ومش حنستسلم، إيه يعني حتعملوا إيه أكتر من الانتو عملينوا احنا مش بنخاف ومش حنطاتي ويسقط النظام الذي يدعم الفساد والسرقة ويشارك فيهم. 

الصورة دي لأحد باحثين جامعة النيل بس دي بتعبر عن حال البلد كلها بتعبر عن حال القانون عن حال القضاء عن حال الدستور، عن حال الشعب الحكومة بتسحل كل دول مش احنا بس.

المجد للحركات الطلابيه ويسقط النظام الفاسد. لن نستسلم ولن نرضخ وسوف ننتزع حقوقنا.