بلطجة علميه

أي حد ممكن يبقى بلطجي عادي الهو بيسرق وبيروع المواطنين، وطبعاً النوع ده من البلطجيه عادةً بيبقى مطلوب القبض عليه أو الداخليه ممكن تأجره بالساعة عشان ينزل يعتدي على متظاهرين أو لأي غرض تاني. النوع ده من البلطجيه منتشر جداً وأي حد ممكن يعمل كدة أصل المسألة مش محتاجة فن تماماً. بس مؤخراً ظهر نوع جديد من البلطجيه النوع ده بقى الناس بتموت في بدل ما بتخاف منه، بيأجر الداخليه بدل ما الداخليه هي البتأجره والقانون بيلتوي عشانه ومش بيسرق محفظة أو فلوس ده بقى بيسرق مباني وأرض. 

للأسف الشديد المهنة لمت بس نعمل إيه بقى نصيب، ما علينا تعالو نعدي على أهم خصائص هذا البلطجي.

أولاً: أعمل إنجاز مهم 

البلطجي ده لازم يكون عامل إنجاز مهم وفريد من نوعه عشان يخلي شعبيته واسعة والناس تموت فيه، ويبقى محل ثقة وشخصيه معروفة بدل ما كان نكرة. ممكن مثلاً يكون خد جايزة نوبل في العلوم بسبب إكتشافه الفيمتو ثانيه. ده مش تلقيح كلام خالص خالص خالص ده مجرد مثال بريء.

ثانياً: الطموح 

لازم يكون عندك طموح بمعنى ليه تسرق حاجة صغيرة ما إنت ممكن تسرق حاجة كبيرة يعني ليه تسرق عجلة أو حتى شقة ما إنت ممكن تسرق 2 مباني مجهزين وأرض مساحتها 127 فدان و ممكن نقول على الإنت سرقه مباني جامعة...... على سبيل المثال طبعاً. 

ثالثاً: الخيال الواسع

لازم يكون خيالك واسع عشان تقدر تخترع قصص تكدب بيها الناس الوحشة الحتقول انك استوليت على الجامعة بتاعتهم و تحاول تفقدهم مصداقيتهم، مثلاً:

النظام القديم كان بيحاربني.....(نعمل إيه بقى مبارك كان منفسن)

الأرض دي بتاعتي أنا حطيط حجر أساس وكانت مخصصه ليه.......(الدليل، هات صورة ليك وانت واقف في الصحراء جانب كومة طوب وقول عليهم حجر أساس. بالنسبة للتخصيص فاتتك دي يا معلم كنت المفروض تضرب ورقة)

قول على العيال البتقول عليك انك سرقت الجامعة بتاعتهم انهم منقادين ومضحوك عليهم.......(بريالة احنا معلش)

قول على أهالي العيال انهم مش فهمين حاجة ومضحوك عليهم.....(طبيعي ماهو لو العيال بريالة أهاليهم حيبقو إيه)

قول مليش دعوة بالمشكلة دي مشكلة الجامعة ما الحكومة......(قول والمصحف)

قول إدارة الجامعة وحشة ومتحلفين مع إبليس.......(شوف ازاي) 

فايزة أبو النجا أحد الرموز الوطنيه.........(أومال مين الفلول مش وخده بالي دي مدوباهم 100 حكومة)

رابعاً: الكذب

أكذب وأكذب كمان ولما تخلص كذب أكذب كمان، ما ينفعش ولا كلمة تطلع من بقك تبقى الحقيقة عشان ده تقريباً عيب. مثلاً قول إن الأرض دي بتاعتي قول إن طلاب الجامعة بيحبوني وعايزين ييجو معاية.

إسرق ماكيت الجامعة الإنت سرقت مبانيها واطلع قول الماكيت ده بتاع المشروع بتاعي وتعبت فيه بغض النظر عن إن الماكيت ده معمول لأرض مساحتها 127 فدان مش 300 بس ما علينا 
فايزة أبو النجا أحد الرموز الوطنيه........(تكرار عارفة بس مش بأيدي)

http://nancymustafa.blogspot.com/2012/04/nile-university.html

خامساً: التطبيل

لازم تبقى طبال محترف، يعني تكرس حياتك للتطبيل للنظام سواء شفيق، شرف، جنزوري، مجلس عسكري، مرسي، جماعة. قضي حياتك بطبل للسلطة.

سادساً: مصلحجي 

شوف مصلحتك فين واجري وراها حتى لو ده تطلب الوقوف مع الباطل ودعم نظام فاسد إيه يعني مش مشكلة المهم مصلحتك وطز في أي حاجة تانية. طبعاً النقطة دي حتساعد في النقطة رقم خمسة الهي التطبيل كل ما تبقى مصلحجي أكتر كل ما مبادئك حتنكمش كل ما قدرتك على التطبيل حتكبر.

سابعاً: أعمل نفسك ميت

أي حد يقولك حقي أو مش حقي، ولا كأنك سامعه. ولو طلع ليه حكم قضاء نفض للحكم وقول مليش دعوة.

ثامناً: خليك بتاع صفقات

اعمل صفقة مع النظام عشان يطعن في الحكم الطلع للخصم وإطعن إنت كمان. اعمل صفقة مع الرئيس إنه إذا خلصلك الليلة إنت حتعمل معه أحلى واجب في الإعلام، أعمل صفقة مع الرئيس خليه يطلعلك قانون قبل جلسة الطعن بكام يوم. 

تاسعاً: خليك ناصح أجر الداخليه بدل ما هي تأجرك  

كل ما العيال بتوع الجامعة الإنت سرقها يضيقوك جبلهم الداخليه تضربهم وبلاش وجع دماغ 

عاشراً: البجاحة ثم البجاحة 

اخبط واحد من الطلاب بالعربيه وبعدين اطلع قول أنا سحبت المحضر العملته ليكم عشان مستقبلكم مهم عندي ولقيتكم حتتحبسوا......(قلب أمك)

روح حط حجر أساس معهد جديد في الأرض الإنت ملكش حق قانوني عليها وحكم المحكمة ادها للعيال المزهقينك

قول أنا مليش دعوة مشكلة الجامعة مع الحكومة واحنا مستمرين في العمل، الكلام ده حتى بعد حكم المحكمة

قول للعيال أنا ممكن أخدكم عندي في المدينة بتاعتي حتى بعد قلة أدبكوا

قول على الإعلام البينتقدك لسرقتك وبلطجتك مأجور وعميل 

قول للعيال بلاش شغل الإعلام ده عشان مش حينفعكوا
فايزة أبو النجا أحد الرموز الوطنيه........(تكرار تاني عارفة بس مش بأيدي)

  

طبعاً أكيد كلنا عرفنا مين البلطجي ده القانون بيتم تشكيلة لمناسبة اغراضه وكلنا عرفنا مين الضحيه، بس أنا حخليني واضحة عشان اللسه معرفش البلطجي هو زويل البيحاول يعمل مشروع مصر للبلطجة العلميه على أرض جامعة النيل المغتصبة، جامعة النيل الطلع ليها حكم محكمة يوم 18/11/2012 ولحد دلوقتي مش عارفة تخش مبانيها، الجامعة الطلابها يتم الإعتداء عليهم من قبل جحافل الأمن الزويل بيستأجرها. جامعة النيل الحكومة مصر كلها وقفه ضدها بداءً من مرسي وقنديل لحد مصطفى مسعد، الجامعة الحقها مهدور بس طلابها لا يزالوا صامدين بعد ما إعتدى عليهم الأمن المركزي مرتين بعد ما تم تلفيق محاضر لهم وبعد ما تم احتجزهم في القسم الطلاب البقالهم أكثر من 130 يوم معتصمين. الطلاب دول وأنا ليه الفخر اني أكون منهم واقفين بثبات وعزة وكرامة ضد الحكومة وزويل رافضين الإستسلام ورافضين الإنحناء والرضوخ.

احنا مش حنستسلم وحنحارب فساد الحكومة وبلطجة زويل.    

المجد للحركات الطلابيه والمجد للأحرار.

جامعة النيل ضد الحكومة

ومازلت مشكلة جامعة النيل مستمرة ولا تنتهي ولا يحاول المسؤلين إيجاد حل لها. إعتصام واعتصمنا لف على المسؤلين ولفينا مظاهرات وإتظهرنا رد المسؤلين علينا كان دائماً هو هو لا يختلف وممكن يتلخص في الأتي:

جامعة النيل وجدت لتبقى........ (مع إنه مش باين خالص من تصرفات الحكومة معنا)

جامعة النيل ليها اهميه علميه كبيرة جداً....... (قول والمصحف )

احنا حنستنا حكم القضاء وحنحترمه وننفذه فوراً....... (يا راجل)

طبعاً الكلام ده يحسس البني أدم إن خلاص الحكومة وقفة معنا والمشكلة فضلها 5 دقائق وتتحل، عشان كدة الداخليه بعتة مرتين جيوش الأمن المركزي لضربنا وساحلنا تحقيقاً لأماني زويل. أول مرة الأمن المركزي جيه كان اليوم 21 في الإعتصام الأمن المركزي دخل حرم الجامعة ودي حاجة غير قانونيه أصلاً وطبعاً تم الإعتداء علينا بالضرب والسحل. أول مرة دي كنت قبل حجتين حكم المحكمة والقانون الطلع لزويل يعني زويل مكنش عنده أي صفة عشان يطلب تدخل الداخليه والداخليه مكنش المفروض تستجيب للطلب، بس ما علينا مش مشكلة ماهي ماشية بالكوسة. تاني مرة دي بقى هي الفعلاً جريمة بمعنى الكلمة لأن دي كانت بعد حكم المحكمة، والحكم كان باحقيه جامعة النيل بالمباني والأرض بس الحكومة تجاهلت حكم المحكمة وبردو ضربونا. 

زويل كان كل ما يتسأل عن جامعة النيل يقول أنا مليش دعوة بالمشكلة والمشكلة بتاعتهم مع الحكومة يا سبحان الله عشان كدة طلب إنه يدخل خصم في قضية الجامعة أصلاً رفعها على الحكومة، كان دائماً بيقول أنا ححترم حكم القضاء وبردو يا سبحان الله عشان كدة طعن في الحكم، فعلاً مفيش تناقض خالص والراجل واضح وصريح. 

أنا عايزة أوضح بس الأحداث المؤديه لتاني مرة اشتباكات مع الأمن.

أولاً احنا طلع لينا حكم محكمة يوم 18/11/2011 الحكم كان بيقول إن التخصيص لزويل يتوقف وإن كل حاجة ترجع لينا أرض ومباني، الحكم ده المفروض يتنفذ فوراً والطعن في الحكم ده لا يوقف التنفيذ. طبعاً ده محصلش الحكومة فضلت تعطل في التنفيذ وتتجاهله مع إن ده غير قانوني أصلاً. وطبعاً عشان زويل بيحترم أحكام القضاء وعلى رأسه من فوق طعن في الحكم وبيطالب إن احنا مناخدش أي حاجة خالص ولا حتى كشك الأمن. بس احنا قلنا خلاص مش مشكلة يطعن براحته كدة كدة هو مالوش حقوق ومفيش ورقة واحدة بتقول إن في حاجة اسمها مدينة زويل و الطعن أكيد حيترفض خصوصاً كمان إن تقرير هيئة المفوضين أوصى برفض الطعن. بعدين يا سبحان الله مرسي طلع قانون بإنشاء مدينة زويل معلش قصدي "مشروع مصر للسرقة العلميه"  لأ لأ قصدي "مشروع مصر للنهضة العلميه" يوم 20/12/2012 والمدينة تنشأ في مقر مدينة الشيخ زايد القانون ده مالوش غير معنى واحد إن مرسي خد حكم المحكمة الطلع لصالح جامعة النيل وكعورة و وقام رميه في الزبالة قضاء إيه وقانون إيه النحترمة مرسي يصنع قوانينه واحكامه الخاصة بيه. بس قلنا مش مشكلة هو مرسي كدة أعطى زويل كيان قانوني بس بردو احنا معنا الحق والوضع لم يتغير. يوم 1/1/2013 كان معاد الجلسة بتاعت الطعن ويا سبحان الله لقينا مرسي وقنديل مصطفى مسعد هما كمان طعنين في الحكم. 

ده وضح حاجات كتير بالنسبة لينا، الحكومة طول الوقت كانت بتقول احنا بنحبكوا أوي بس مش بتعمل أي حاجة طلعت منحازة من أول لحظة لزويل، الحكومة كان في اديها حاجات كتير تعملها الحكومة الطلعت قانون لزويل كان ممكن تطلع لينا احنا كمان قانون، كانت ممكن تنفذ الحكم لكن الحكومة قررت تتجاهل حكم المحكمة وتختصمنا على الأقل الحكومة كان ممكن ما تطعنش!!!! 

يوم 3/1/2013 جلنا خبر إن زويل رايح المباني بتاعتنا والأرض بتاعتنا عشان يحط حجر أساس معهد حلمي للعلوم، فكان رد الفعل الطبيعي إن احنا نروح هناك إحتجاجاً على البيحصل. احنا رافضين تماماً إن زويل يستغل المباني بتاعتنا رافضين تأمين الداخليه للمكان الداخليه راحت بناءً على إيه زويل مالوش صفة إنه يطلب التأمين ولا يمتلك المكان أصلاً عشان يطلب تأمين والداخليه تستجيب. احنا رحنا هناك وبعد إنتهاء الحفل حولنا إن احنا نكلم الناس الحضرت الحفلة عشان البيحصل ده جريمة وطبعاً كان رد الداخليه انها تعتدي علينا عشان تأمن زويل وهو خارج الداخليه اعتدت على أصحاب الحقوق لحماية اللص. 

احنا دلوقتي زويل ضدنا مرسي ضدنا قنديل ضدنا ومسعد ضدنا، الحكومة كلها بتحاربنا، ليه؟ عشان زويل بيستعمل نفوذه وشعبيته لمساعدة حكومة لا تعرف معنى الحقوق والقانون وفي المقابل هما بيحربونا. مشكلة الجامعة مش مشكلتنا احنا بس دي تمثل مشكلة البلد باكملها، الحكومة بتدور على المصالح الشخصيه وبترمي القانون في الزبالة وبتهمش القضاء. الحكومة دي لا تنحاز للقانون الحكومة دي لا تنحاز للحق الحكومة دي لا تنحاز للعدل، الحكومة منحازة للباطل والظلم والفساد الحكومة دي لا تقف في صف الشعب والمستضعفين، الحكومة في الأول والأخر تبحث عن المصالح الشخصيه. اليقف في صف الحرامي يبقى حرامي زيه واليقف في صف الفاسد يبقى فاسد زيه.

الحكومة تعتقد إن الطلبه شوية عيال مش فهمين هما بيعملو إيه وده أبعد ما يكون عن الحقيقة طلاب مصر هم المستقبل واحنا الحنعمل حملة نضافة للبلد دي. احنا حنحارب مرسي وقنديل والحكومة كلها وحناخد حقوقنا بالذوق بالعافية حنخدها ومش حنستسلم، إيه يعني حتعملوا إيه أكتر من الانتو عملينوا احنا مش بنخاف ومش حنطاتي ويسقط النظام الذي يدعم الفساد والسرقة ويشارك فيهم. 

الصورة دي لأحد باحثين جامعة النيل بس دي بتعبر عن حال البلد كلها بتعبر عن حال القانون عن حال القضاء عن حال الدستور، عن حال الشعب الحكومة بتسحل كل دول مش احنا بس.

المجد للحركات الطلابيه ويسقط النظام الفاسد. لن نستسلم ولن نرضخ وسوف ننتزع حقوقنا.