أنا قررت لتاني مرة اني اكتب عن التحرش الجنسي بس المرة دي مش عشان أشجع البنات و الستات انهم يرضوا على المتحرش و يتمسكوا بحقهم في الأمان والإحترم المرة دي بسبب حملة "ما تفطريش صائم" و حاجات تانية من نفس المنطق المريب.
بس مبدئياً كدة أنا عايزة بس أعرف الناس الأول على على أنواع التحرش تاني و هما: لمس، بسبسه، النظر المتفحص للجسد، تعليقات، متابعه أو ملاحقة، معاكسة تليفونيه، كشف عن أعضاء جسديه، إقتراحات جنسيه تعبيرات بالوجه و أكيد أكيد يقع تحت التحرش الإغتصاب و هتك عرض. أنا جبت القائمة المفصلة دي من موقع خريطة التحرش الجنسي و أنا قررت أحطها لأن نفسي الناس تجمع إن التحرش الجنسي مش مجرد لمس و بس لكن هو يشمل كل حاجة بتمس البنت بأي طريقة.
من الحاجات الاستفزتني جيداً مؤخراً على غير العادة هي حملة "ما تفطريش صائم" هي مش مختلفة كتير عن نظرة المجتمع للراجل و الست وهي إن البنت هي السبب في البيحصلها عشان هي مش محترمة و الراجل يا عني مظلوم لما بيشوف الحاجات دي مش بيعرف يمسك نفسوا. أنا بس الاستفزني في الحملة دي هي الجانب الديني الظهر إذ فجأةً من غير أي سبب، فجأة لقينا نفسنا بنتحمل ذنب رجاله هرمنتهم هي البتتحكم فيهم و مش بيعرفوا يمسكوا نفسهم. أنا بس عايزة أفهم ليه مجتمعنا حط كل واحد فينا في دور معين ليه الست إتحطت في دور الغواية و العهر و ليه الراجل اتحط في دور الكلب البلدي في موسم التزاوج. الأدوار دي مهينة لكل واحد فينا و مش من الطبيعي إن احنا نتقبلها من غير أي مناقشة.
مش من الطبيعي إن الراجل يلعب دور كائن متحرش هرموناتوا بتحكموا لما يشوف أي حاجة مؤنثة يفقد أعصابوا و السيطرة على نفسوا و عقلوا ربنا مخلقكش كدة يا ابني متمشيش ورى تصنيف مجتمع عايز يجردك من انسانيتك و دينك و أخلاقك. مش لازم تهين أي وحدة مشية قدامك عشان تتماشى مع طريقة تفكير المجتمع ده مش صح إنت مش حيوان. مش من الطبيعي انك تتحرش بوحدة و بعدين تقول أصلها كانت لبسة مش محترم فمعرفتش أمسك نفسي. إنت مش كلب!!!! ربنا مخلقكش و الهرمونات مسيطرة عليك. اه يا ابني عمرك شفت بنت تحرشت بولد عشان شكلو كان حلو لدرجة انها مقدرتش تسيطر على نفسها؟؟ الحمدلله احنا مش حيوانات فلما البنت بتشوف واحد عجبها مش بتعمل حاجة.
لكن طبعاً المجتمع بيسقف لحاجة زي دي عشان البنت تستاهل أصلها مش لابسة محترم فهي السبب الولد ياعني مظلوم. بس عندي سؤال اه تعريف لبس محترم؟ لكل واحد فينا تعريف للبس المحترم بيختلف من شخص للتاني مش كلنا عندنا نفس النظرة لكل حاجة. وبعدين حتى لو البنت مش لابسة محترم مش من حق أي حد إنو يحسبها ويقرر يعاقبها عشان هو قرر انها غلطت.
للمرة ال-٥٠٠٠ عذر انها مش لبسة محترم فكان لزم أربيها أو تستاهل أو معرفتش أمسك نفسي ده مش عذر ده استهبال ده سبب كل واحد بيديه لنفسوا عشان ضميروا يبطل يزعجوا على الهو بيعملوا في بنات الناس. إنت مش كلب و لا طفل عندوا 3 سنين بيعاني من تبول لا إرادي و محتاج حفاضات كفاية بقى.
مهما كنت البنت لبسه من حقها انها تمشي في الشارع من غير ما تتلمس أو تسمع تعليق حقير يخليها عايزة تنزل فيك ضرب لحد ما ربنا يخدك, ليه؟ عشان إنت مش حيوان و هي حرة تلبس زي ما هي عايزة مش من حقك انك تعملها أي حاجة لأي سبب من الأسباب.
هو حلو لغاية " هي حرة تلبس زي ما هي عايزة مش من حقك انك تعملها أي حاجة لأي سبب من الأسباب."... لو هي حرة تلبس أي حاجة كان ممكن تليس البيكيني و تمشي بية بس فية حاجة أسمها عرف المجتمع و الصلاح الديني ...ثانيا هي بتأذيني بلبسها مش تحرش .. ثانيا هي ممكن ميكونش تحرش بس بتحرك مشاعر أتجاة الراجل عشان كدة في لبس قميص النوم متوح الفكرة منة عشان يغوي
ReplyDelete.. فا مش معقول نفسد في المجتمع و نقول دي حرة أنت حر مالم تضر
زي ما انت حضرتك بتلبس شورت ورجلك تبان يحق للست انها تلبس شورت ورجلها يبان بس الفرق في مجتمعنا المكبوت لو انك لبستوا حبقولوا عادي ومفيشهاش حاجة بس لو لبسته البنت وبينت رجليها حيقولوا عليها بنت مش محترمة وفساد للمجتمع وهي سبب التحرش و......الخ وزي ما أنت عندك عقل تفكر فيه البنت دي ليها عقل تفكر فيه هي اللي بتعمله غلط ولا لا مش أنت الي تجي تحاسبها وتفهمها لو كان الموضوع على كدا كان ربنا خلق العقل للذكر فقط علشان هو يفهمها أزاي تلبس , ولما تشوف بنت لابسه لبس هي عجبها وأنت شايفه مش محترم أبقى أفهم انها فكرت و أستخدمت عقلها وقررت أنها تخرج بالشكل دا , وبعدين لما هيا بتأذيك بلبسها غض النصر ياخويا زي ما الأجانب الستات هناك بتمشي زي مهيا عايزة وكلهم يغضوا النظر ,و أشمعنى غضوا النظر دي ما بترددوهاش كتير ولا بتسعملوها زي ناقاصت عقل ودين والشرع حلل أربع ولو أمرت حد يسجد لحد و ......ألخ , ولا هو الموضوع بيتاخذ على حسب ,مصلحتكم
Deleteنرجع لحاجة حضرتك نسيتها إن سواء البنت محجة مش محجبة منقبة مش منقبة في حد لا مفر بيتحرش بيها ومهما كان لبسها مش من حق أي حد إنو يهنها وبعدين الرجل لو احنا بنتكلم من ناحية الدين المفروض يغض بصروا ولا اه؟
ReplyDeleteماينفعش نيجيب الغلط علي البنت لان الغلط علي الرجل من البدايه لانه مسلم فبكل بساطه يغض البصر ع الحاجه اللي هو مش عايزها بس ماقدرش لان معدوم الشخصيه عقله هو اللي بيتحكم فيه و لكن دلوقتي مصر موبوئه جنسيا .
ReplyDelete